पुणे : येथील कलातीर्थ संस्थेतर्फे ‘मैत्र जीवाचे’ हे चित्र प्रदर्शन बालगंधर्व कलादालनात भरविण्यात आले असून, यातील सुमारे तीन हजार पाचशे खोडरबर आणि पेन्सिली यांचा वापर करून रेखाटण्यात आलेले भारतीय जवानाचे चित्र विशेष आकर्षण ठरत आहे.
कलातीर्थ संस्थेमध्ये शिक्षण घेणाऱ्या मुलांनी साकारलेली सुमारे शंभर चित्रे आणि शिक्षकांनी तयार केलेली व्यक्ती तसेच, निसर्गचित्रे येथे पाहता येणार आहेत. हे प्रदर्शन कलाप्रेमींसाठी एक पर्वणी आहे. या मुलांच्या पालकांनी संस्थेला वह्या, पुस्तके, पेन्सिल, खोडरबर हे साहित्य दिले असून, हे प्रदर्शन पूर्ण झाल्यानतंर हे सर्व साहित्य नगर येथील स्नेहालय अनाथ आश्रमातील मुलांना दिले जाणार आहे.
शनिवार ते सोमवारपर्यंत (ता. ३०) चालणाऱ्या या प्रदर्शनात विविध मान्यवर कलाकार चित्रे रेखाटणार असून ते मुलांना मार्गदर्शनही करणार आहेत.
(‘मैत्र जीवाचे’ या प्रदर्शनाचा व्हिडिओ सोबत देत आहोत.)